سپریم کورٹ کے فیصلے پر شدیدناراضی،امریکی صدر نے عالمی ٹیرف 10 سے بڑھا کر 15 فیصد کر دیا

سپریم کورٹ کے فیصلے پر برہم امریکی صدر ڈونلڈ ٹرمپ نے عالمی تجارتی  ٹیرف 10 فیصد سے بڑھا کر 15 فیصد کر دیا۔ڈونلڈ ٹرمپ نے ایک بیان میں کہا کہ امریکی صدر کی حیثیت سے دنیا بھر کے ممالک پر عائد 10 فیصد عالمی ٹیرف کو بڑھا کر 15 فیصد تک کر رہا ہوں۔ٹیرف میں شامل کئی ممالک ایسے ہیں جو کئی دہائیوں سے امریکا کا استحصال کرتے آرہے ہیں، میری انتظامیہ آنے والے مہینوں میں قانونی طور پر نئے اور قابلِ اجازت ٹیرف کا تعین کرے گی۔

واضح رہے کہ جمعے کو  امریکی سپریم کورٹ نے دوسرے ملکوں پر صدر ٹرمپ کے اضافی ٹیرف غیر قانونی قرار دے دیئے تھے۔ امریکی عدالت کاکہناتھاکہ ٹرمپ نے جس قانون کے تحت یہ ٹیرف لگائے وہ قومی ایمرجنسی کے لیے بنایا گیا ، یہ قانون ٹرمپ کو اضافی ٹیرف لگانے کی اجازت نہیں دیتا۔

امریکی عدالت کی جانب سے دوسرے ملکوں پر اضافی ٹیرف غیر قانونی قراردیے جانے پر صدر ڈونلڈ ٹرمپ نے ردعمل دیتے ہوئے کہا کہ تمام ممالک پر فوری طورپر 10فیصد ٹیرف عائد کردیا تھا۔جس میں اب مزید 5فیصدکا اضافہ کردیاگیاہے۔