ٹرمپ کے عالمی جنگ کے انتباہ کے بعد امریکی فوج کا خطرناک میزائل تجربہ

امریکی میرین کور نے اپنے حملہ آور ہیلی کاپٹروں کے لیے ایک جدید اور طویل فاصلے تک مار کرنے والے ہتھیار کا کامیاب تجربہ کر لیا ہے۔ یہ پیش رفت ایسے وقت میں سامنے آئی ہے جب امریکی صدر ڈونلڈ ٹرمپ عالمی جنگ کے خطرے سے خبردار کر چکے ہیں۔

امریکی بحری حدود میں واقع اٹلانٹک ٹیسٹ رینج پر میرین کور نے AH-1Z وائپر ہیلی کاپٹر سے جدید ریڈ وولف (Red Wolf) میزائل فائر کیا، جس نے سمندر میں موجود ہدف کو انتہائی درستگی کے ساتھ نشانہ بنایا۔

یہ جدید میزائل دفاعی کمپنی L3Harris نے تیار کیا ہے۔ ریڈ وولف ایک ماڈیولر، تیز رفتار اور کم بلندی پر پرواز کرنے والا میزائل ہے، جو نہ صرف طویل فاصلے پر موجود اہداف کو نشانہ بنانے کی صلاحیت رکھتا ہے بلکہ ہدف سے متعلق معلومات منتقل کرنے کی صلاحیت بھی رکھتا ہے۔

دفاعی ماہرین کے مطابق یہ میزائل امریکی میرین کور کی جنگی صلاحیتوں میں نمایاں اضافہ کرے گا اور مستقبل کی جدید جنگی حکمتِ عملی میں اہم کردار ادا کر سکتا ہے۔