قتل و غارت بند نہ ہوا تو تمام آپشنز  کھلے ہیں، امریکا کا ایران کو سخت پیغام

اقوام متحدہ کی سلامتی کونسل کے اجلاس میں امریکی مندوب مائیک والٹز نے ایران میں جاری مظاہروں اور حکومت کے اقدامات پر تشویش کا اظہار کیا۔ انہوں نے کہا کہ لاکھوں ایرانی حکومت کے خلاف احتجاج کر رہے ہیں اور امریکا ان بہادر شہریوں کے ساتھ کھڑا ہے۔

امریکی مندوب نے ایران کو واضح پیغام دیا کہ مظاہرین پر جاری قتل و غارت فوری طور پر بند ہونا چاہیے، بصورت دیگر مختلف آپشنز پر غور کیا جائے گا۔ انہوں نے کہا کہ صدر ٹرمپ عمل پر یقین رکھتے ہیں اور باتوں سے زیادہ ایکشن پر توجہ دیتے ہیں۔

والٹز نے ایران کی حکومت کے اقدامات کو مذاکرات کے برعکس قرار دیتے ہوئے کہا کہ مظاہرین پر طاقت کا وحشیانہ استعمال عالمی امن اور سلامتی کے لیے خطرہ ہے۔ انہوں نے ایران میں انٹرنیٹ بندش کی بھی مذمت کی اور الزام عائد کیا کہ یہ اقدام زمینی حقائق کو دنیا سے چھپانے کے لیے کیا جا رہا ہے۔

انہوں نے مزید کہا کہ ایران دہشت گرد تنظیموں کا سرپرست ہے اور اس کا طرز عمل نہ صرف اپنے عوام بلکہ عالمی استحکام کے لیے بھی خطرہ ہے۔