جنگ بندی و مذاکرات کے بیچ ایران کی فوجی صلاحیتوں کے حوالے سے دوبارہ سوالات کھڑے ہوگئے

امریکہ اور ایران کے درمیان جاری جنگ بندی اور دوحہ مذاکرات کے دوران ایران کی اصل فوجی صلاحیتوں کے حوالے سے عالمی سطح پر دوبارہ سوالات کھڑے ہو گئے ہیں۔

اسرائیل اور امریکہ کی جانب سے یہ دعویٰ کیا گیا ہے کہ حالیہ تنازع کے دوران ایرانی دفاعی ڈھانچے کو شدید نقصان پہنچایا گیا ہے۔ انٹیلی جنس اندازوں کے مطابق ایران کا دفاعی صنعتی ڈھانچہ، میزائل لانچرز اور ایئر ڈیفنس سسٹمز کا بڑا حصہ غیر فعال ہو چکا ہے اور بعض رپورٹس میں دعویٰ کیا گیا ہے کہ ایران کی 80 فیصد سے زائد دفاعی صلاحیت متاثر ہوئی ہے۔ تاہم، دفاعی ماہرین کا کہنا ہے کہ اتنے بڑے نقصان کے باوجود ایران کا مکمل عسکری ڈھانچہ منہدم نہیں ہوا ہے۔ امریکی و اسرائیلی دعووں کے برعکس، ایرانی پاسدارانِ انقلاب (آئی آر جی سی) کے پاس موجود زیر زمین میزائل نیٹ ورکس کا ایک بڑا اور اہم حصہ اب بھی مکمل طور پر محفوظ ہے، جن میں سے کئی سسٹمز کو اب دوبارہ فعال کیا جا رہا ہے۔ سیٹلائٹ تصاویر اور تازہ ترین انٹیلی جنس رپورٹس سے ظاہر ہوتا ہے کہ ایران نے تباہ شدہ تنصیبات کی تیزی سے مرمت شروع کر دی ہے اور بعض مقامات پر عسکری پیداوار کا عمل بھی بحال ہو چکا ہے۔

بعض امریکی ذرائع نے اس بات کی بھی تصدیق کی ہے کہ جنگ کے بعد ایران کی ڈرون پیداوار کی صلاحیت میں دوبارہ تیزی سے اضافہ ہو رہا ہے۔ ماہرین کے مطابق، ایران کے پاس اب بھی محدود مگر انتہائی مؤثر عسکری صلاحیتیں موجود ہیں، جن میں جدید ڈرونز، زیر زمین میزائل سسٹمز، اور بحیرہ عمان و آبنائے ہرمز جیسے اہم ترین سمندری راستوں میں بحری سرگرمیاں اور ناکہ بندی کرنے کی بھرپور صلاحیت شامل ہے۔ یہی وجہ ہے کہ دوحہ مذاکرات کے میز پر ایران کی عسکری حیثیت کو نظرانداز کرنا ناممکن دکھائی دے رہا ہے۔