ٹرمپ انتظامیہ کا بڑا فیصلہ: 19 ممالک کے امیگریشن و شہریت کیسز منجمد

امریکہ نے 19 ممالک کے شہریوں کی تمام امیگریشن درخواستیں جن میں گرین کارڈ، ویزے اور حتیٰ کہ شہریت کی تقریبات بھی شامل ہیں فوری طور پر روک دی ہیں۔ یہ اقدام گزشتہ ہفتے واشنگٹن ڈی سی میں دو نیشنل گارڈ اہلکاروں پر فائرنگ کے واقعے کے بعد سامنے آیا ہے۔

سی بی ایس نیوز کے مطابق امریکی امیگریشن سروس USCIS کی اندرونی ہدایات میں عملے کو حکم دیا گیا ہے کہ ان 19 ممالک سے تعلق رکھنے والے تمام زیر التوا کیسز پر کوئی حتمی فیصلہ نہ کیا جائے۔ اس میں اُن تارکینِ وطن کی شہریت کی تقریبات بھی شامل ہیں جو امریکی شہری بنتے ہی تھے۔

ٹرمپ کے جون میں جاری کردہ سفری پابندی کے تحت افغانستان، ایران، لیبیا، صومالیہ، یمن سمیت 19 ممالک شامل تھے، جبکہ تازہ ہدایات کے بعد ان ممالک کے تمام امیگریشن کیسز کا دوبارہ سیکورٹی جائزہ لینے کا عمل شروع کردیا گیا ہے، جس میں دوبارہ انٹرویوز بھی ممکن ہیں۔

محکمہ ہوم لینڈ سیکیورٹی کا کہنا ہے کہ حکومت ’’قوم کے مستقبل کے تحفظ‘‘ کے لیے ہر درخواست کا ازسرِنو جائزہ لے رہی ہے۔ حکام یہ بھی اشارہ دے رہے ہیں کہ سفری پابندی کی فہرست میں مزید ممالک شامل کیے جانے کا امکان ہے، جس سے یہ تعداد تقریباً 30 تک پہنچ سکتی ہے۔

امیگریشن ماہرین کے مطابق اتنے بڑے پیمانے پر تمام امیگریشن فوائد روک دینا ’’غیر معمولی‘‘ اقدام ہے، کیونکہ اس میں ہر قسم کی درخواستیں شامل کر دی گئی ہیں۔