امریکا نے اپنے شہریوں کو فوری طور پر ایران چھوڑنے کی ہدایت کر دی

امریکا نے ایران میں کشیدہ صورتحال کے پیشِ نظر تمام امریکی شہریوں کو فوری طور پر ملک چھوڑنے کی ہدایت جاری کر دی ہے۔ ایران میں امریکا کے ورچوئل سفارت خانے کے مطابق ملک بھر میں جاری احتجاجی مظاہرے شدت اختیار کر سکتے ہیں جو تشدد کی صورت بھی اختیار کر سکتے ہیں۔

سفارت خانے نے امریکی شہریوں کو مشورہ دیا ہے کہ اگر ممکن ہو تو زمینی راستوں کے ذریعے آرمینیا یا ترکیہ کا رخ کریں اور ایسے انتظامات کریں جن میں امریکی حکومت کی مدد پر انحصار نہ ہو۔

بیان میں کہا گیا ہے کہ جو افراد ایران چھوڑنے سے قاصر ہیں وہ گھروں کے اندر محفوظ مقامات پر رہیں، احتجاجی سرگرمیوں سے دور رہیں اور خوراک، پانی، ادویات سمیت ضروری اشیاء کا ذخیرہ کر لیں۔

ادھر امریکی میڈیا کے مطابق نائب صدر جے ڈی وینس کی قیادت میں اعلیٰ حکام نے صدر ڈونلڈ ٹرمپ پر زور دیا ہے کہ ایران کے خلاف کسی ممکنہ فوجی کارروائی سے قبل سفارت کاری کو موقع دیا جائے۔