بھارتی کمپنیوں کی امریکا میں بھی ویزہ جعلسازی، بڑا سکینڈل سامنے آگیا

دنیا بھر میں بھارتی کمپنیوں کے مالی بدعنوانی اور سائبر فراڈ کے منظم دھندے میں تیزی آ گئی ہے اور یکے بعد دیگرے کئی بڑے اسکینڈلز منظرِ عام پر آنے لگے ہیں۔ مشہور بھارتی جریدے ‘دی انڈین ایکسپریس’ کے مطابق، امریکا میں ایچ ون بی (H-1B) اور پرم (PERM) ویزا پروگرامز میں مبینہ بڑے پیمانے پر فراڈ کی تحقیقات کا آغاز کر دیا گیا ہے، جس کے باعث مودی حکومت کو عالمی سطح پر شدید شرمندگی کا سامنا ہے۔ امریکی محکمہ محنت کے انسپکٹر جنرل انتھونی ڈی ایسپوزیتو نے تصدیق کی ہے کہ ان جعلی ویزا اسکیموں کے ذریعے غیر ملکی کارکنوں کے استحصال اور امریکی شہریوں کو نقصان پہنچایا جا رہا تھا، جس پر ملوث کمپنیوں کو سمن جاری کر دیے گئے ہیں۔ امریکی نائب صدر جے ڈی وینس کی سربراہی میں قائم اعلیٰ سطحی ٹاسک فورس ان ویزا اسکینڈلز کی تفتیش کر رہی ہے، اور حیران کن طور پر تحقیقات کے دائرے میں بھارت کی معروف آئی ٹی کمپنی ‘کوگنیزنٹ’ (Cognizant) کا نام بھی شامل پایا گیا ہے۔ اس اسکینڈل نے بین الاقوامی سطح پر بھارتی کارپوریٹ سیکٹر کے جھوٹ اور سائبر جرائم کے گٹھ جوڑ کو بے نقاب کر دیا ہے۔