خدا نے زمین اسرائیلیوں کو دی، دریائے نیل سے فرات تک قبضہ ان کا حق ہے: امریکی سفیر

مقبوضہ بیت المقدس: اسرائیل میں امریکا کے سفیر مائیک ہکابی نے کہا ہے کہ اگر اسرائیل مشرق وسطیٰ کے وسیع علاقوں پر کنٹرول حاصل کر لے تو انہیں اس پر کوئی اعتراض نہیں ہوگا۔

ایک انٹرویو کے دوران مائیک ہکابی کا کہنا تھا کہ خدا نے یہ زمین اسرائیلیوں کو دی ہے اور پورے خطے پر اختیار ان کا حق ہے۔ انہوں نے مزید کہا کہ اگر اسرائیل دریائے نیل سے دریائے فرات تک کے علاقوں پر کنٹرول حاصل کر لے تو یہ بھی قابلِ قبول ہوگا۔

یاد رہے کہ دریائے نیل سے دریائے فرات تک کا تصور ایک جغرافیائی اصطلاح کے طور پر جانا جاتا ہے، جسے بعض حلقے گریٹر اسرائیل کے نظریے سے جوڑتے ہیں۔ اس تصور کے مطابق ایک ایسا خطہ مراد لیا جاتا ہے جو لبنان سے لے کر سعودی عرب کے صحراؤں تک اور بحیرہ روم سے لے کر عراق میں دریائے فرات تک پھیلا ہوا ہو۔

رپورٹس کے مطابق ڈونلڈ ٹرمپ نے گزشتہ سال مائیک ہکابی کو اسرائیل میں امریکا کا سفیر مقرر کیا تھا۔ ان کے حالیہ بیان کے بعد مشرق وسطیٰ کی سیاست میں نئی بحث چھڑ گئی ہے۔