پاک امریکہ تعلقات میں جدت، تخلیقی صلاحیت اور مواقع اہم ہیں: امریکی قونصل جنرل

امریکی قونصلیٹ جنرل لاہور میں قائم مقام قونصل جنرل سٹیٹسن سینڈرز کی میزبانی میں امریکہ کی آزادی کی 250 ویں سالگرہ (Freedom 250) اور دونوں ممالک کے درمیان آٹھ دہائیوں پر محیط دیرینہ تعلقات کی مناسبت سے “آزادی کی گونج” (Echoes of Freedom) کے عنوان سے ایک پروقار استقبالیہ کا انعقاد کیا گیا۔ تقریب میں گورنر پنجاب سردار سلیم حیدر خان نے بطور مہمانِ خصوصی شرکت کی، جبکہ دیگر ممتاز سرکاری، تعلیمی، صحافتی اور کاروباری شخصیات نے بھی شمولیت کی۔ تقریب میں امریکی اور پاکستانی قومی ترانے بجائے گئے، جبکہ پاکستانی آرٹسٹوں کی جانب سے تیار کردہ ’لبرٹی بیل‘ کے ماڈلز اور جاز موسیقی پیش کی گئی۔

اپنے خطاب میں قونصل جنرل سٹیٹسن سینڈرز نے امریکی خارجہ پالیسی کے چار مرکزی ستونوں—جدت، تخلیقی صلاحیت، باہمی رابطے اور مواقع—پر روشنی ڈالی۔ انہوں نے دوطرفہ تجارتی حجم 8.5 ارب ڈالر تک پہنچنے کو دونوں ممالک کے مضبوط معاشی تعلقات کا ثبوت قرار دیا اور ہری پور میں گوگل کروم بکس کی اسمبلی لائن سے لے کر سیالکوٹ کے فیفا ورلڈ کپ فٹ بالز کی عالمی تیاری تک کی مشترکہ کامیابیوں کا ذکر کیا۔ قونصل جنرل نے پنجاب کے باصلاحیت نوجوانوں اور تعلیمی اداروں کی صلاحیتوں پر اعتماد کا اظہار کرتے ہوئے واضح کیا کہ امریکہ پاکستان میں اقتصادی اور تکنیکی شعبوں کی پائیدار ترقی اور روزگار کے مواقع پیدا کرنے کے لیے پرعزم ہے۔