گل پلازہ آتشزدگی: امریکی قونصل خانہ کراچی کا اظہارِ تعزیت، امدادی ٹیموں کو خراجِ تحسین

امریکی قونصل خانہ کراچی نے گل پلازہ میں پیش آنے والے افسوسناک آتشزدگی کے واقعے پر کراچی کے عوام اور متاثرہ خاندانوں سے دلی تعزیت کا اظہار کیا ہے۔ امریکی قونصل خانے کی جانب سے جاری بیان میں سانحے میں قیمتی انسانی جانوں کے ضیاع پر گہرے رنج و غم کا اظہار کیا گیا ہے۔

بیان میں کہا گیا ہے کہ متحدہ ریاستہائے امریکہ اس المناک واقعے پر سوگوار خاندانوں کے غم میں برابر کا شریک ہے اور اس مشکل گھڑی میں کراچی کے عوام کے ساتھ مکمل یکجہتی کا اظہار کرتا ہے۔

امریکی قونصل خانے نے فوری امدادی کارروائیوں میں حصہ لینے والی ٹیموں کی انتھک کوششوں کو سراہتے ہوئے کہا کہ امدادی اہلکاروں نے نہایت مشکل اور خطرناک حالات میں پیشہ ورانہ ذمہ داریوں کا مظاہرہ کیا، جو قابلِ تحسین ہے۔

بیان میں زخمیوں کی جلد صحتیابی اور لاپتہ افراد کی بحفاظت واپسی کے لیے نیک خواہشات اور دعاؤں کا اظہار بھی کیا گیا ہے۔ امریکی قونصل خانے کا کہنا تھا کہ کراچی اس وقت سانحے کے اثرات سے نکلنے اور بحالی کے عمل سے گزر رہا ہے، اور آئندہ ایسے واقعات کی روک تھام کے لیے مشترکہ کوششیں ناگزیر ہیں۔