امریکی شہریت کے قوانین میں بڑی تبدیلی کی تجویز ، دوہری شہریت ختم کرنے کا بل پیش

واشنگٹن: اوہائیو سے ریپبلکن سینیٹر برنی مورینو نے ایسا نیا بل پیش کر دیا ہے جو لاکھوں امریکیوں کی شہریت کو متاثر کر سکتا ہے۔
“ایکسکلیوزِو سٹیزن شپ ایکٹ آف 2025” کے مطابق امریکی شہری صرف اور صرف امریکا سے وفاداری کے پابند ہوں گے، اور اگر یہ قانون نافذ ہوگیا تو دوہری شہریت رکھنے والے امریکی اپنی امریکی شہریت برقرار نہیں رکھ سکیں گے۔

بل کے متن میں کہا گیا ہے کہ امریکی شہری “صرف ایک ہی ملک “امریکا” سے خصوصی وابستگی رکھیں”۔
نیوز ویک کے مطابق مورینو کے دفتر سے مزید ردعمل کے لیے رابطہ کیا گیا ہے۔

کون متاثر ہوگا؟

اگر یہ قانون منظور ہو جاتا ہے تو دوسرے ملک کی شہریت رکھنے والا کوئی بھی فرد بیک وقت امریکی شہری نہیں رہ سکے گا۔
تاہم یہ واضح نہیں کہ اس تبدیلی سے کتنے افراد متاثر ہوں گے، کیونکہ امریکی قانون شہریوں کو دوہری شہریت ظاہر کرنے یا رجسٹر کروانے کا پابند نہیں کرتا۔

ماہرین کے مطابق امریکا میں دوہری شہریت رکھنے والوں کی تعداد 5 لاکھ سے 57 لاکھ کے درمیان ہو سکتی ہے۔
اسی دوران فوربس کی ایک رپورٹ میں کہا گیا کہ تقریباً 40 فیصد امریکی کسی نہ کسی ملک کی شہریت کے اہل ہوسکتے ہیں، اگرچہ اہل ہونا اس بات کی ضمانت نہیں کہ وہ دوہری شہریت رکھتے بھی ہوں۔