امریکہ کی متعدد ریاستیں تباہ کن برفانی طوفان کی زد میں، ہزاروں پروازیں منسوخ

امریکہ کی کئی ریاستیں شدید برفانی طوفان کی لپیٹ میں ہیں، جس کے باعث 20 کروڑ سے زائد افراد متاثر ہونے کا خدشہ ہے۔ ٹیکساس، اوکلاہوما اور آرکنساس میں شدید برفباری ہوئی، جس کے بعد 18 ریاستوں میں ایمرجنسی نافذ کر دی گئی۔

واشنگٹن، نیویارک، فلاڈیلفیا اور بوسٹن میں بھی شدید برفباری کا امکان ہے۔ نیویارک کے میئر نے شہریوں کو گھروں میں رہنے کی ہدایت کی ہے جبکہ 9 ریاستوں میں نیشنل گارڈز کو متحرک کیا گیا ہے۔

شدید طوفان کے باعث امریکہ بھر میں 10 ہزار سے زائد پروازیں منسوخ ہو چکی ہیں، اور 84 ہزار سے زائد صارفین بجلی سے محروم ہیں۔ امریکی صدر نے کہا کہ ریاستی اداروں کے ساتھ مل کر شہریوں کی حفاظت یقینی بنائی جائے گی اور طوفان کی زد میں آنے والی تمام ریاستوں سے مسلسل رابطے میں ہیں۔