امریکا میں شدید برفانی طوفان، 30 ہلاکتیں، لاکھوں متاثر

امریکا میں شدید برفانی طوفان نے نظام زندگی کو منجمد کر دیا ہے، مختلف حادثات میں کم از کم 30 افراد ہلاک ہو گئے۔ واشنگٹن، نیویارک، ٹیکساس، اوکلاہوما، نیو جرسی سمیت درجنوں ریاستوں میں برفباری اور بارش جاری ہے۔

شدید برفانی طوفان کے باعث امریکا بھر میں 19 ہزار پروازیں منسوخ ہو چکی ہیں، جبکہ واشنگٹن میں وفاقی دفاتر بند ہیں۔ آرکنساس سے نیو انگلینڈ تک ایک فٹ سے زائد برف پڑ چکی ہے، اور پیٹس برگ کے شمالی علاقوں میں بیس انچ تک برف ریکارڈ کی گئی ہے۔

خراب موسم کے باعث سڑکیں بند، تعلیمی ادارے تعطیل، اور دس لاکھ سے زائد افراد بجلی سے محروم ہیں۔ نیویارک سٹی میں آٹھ افراد کی لاشیں کھلے مقامات سے ملی ہیں۔ چوالیس ریاستوں کے بیس کروڑ افراد کے لیے شدید ترین ٹھنڈ کی وارننگ جاری کی گئی ہے، جبکہ چوبیس ریاستوں میں ایمرجنسی نافذ کر دی گئی ہے۔