اردن میں امریکی بلیک ہاک ہیلی کاپٹرز متبادل مقامات پر منتقل

اردن میں واقع امریکی فورسز کے اہم ترین ‘موفق السلطی’ ایئربیس سے بلیک ہاک (UH-60) ہیلی کاپٹرز کو پرواز کے بجائے فلیٹ بیڈ ٹرکوں کے ذریعے متبادل اور محفوظ مقامات پر منتقل کرنے کا غیر معمولی عمل شروع کر دیا گیا ہے۔ غیر ملکی میڈیا اور اوپن سورس انٹیلی جنس (OSINT) رپورٹس کے مطابق ہیلی کاپٹرز کو مکمل اسمبل شدہ حالت میں رات کے اندھیرے میں بھاری ٹریلرز پر لاد کر منتقل کیا جا رہا ہے۔ یہ نقل و حرکت ایسے وقت میں سامنے آئی ہے جب امریکہ اور ایران کے درمیان گہری عسکری کشیدگی کے باعث خطے میں امریکی سیکیورٹی تنصیبات پر مسلسل ڈرون اور بیلسٹک میزائل حملوں کا شدید خطرہ لاحق ہے۔

دفاعی ماہرین کا کہنا ہے کہ امریکی ہیلی کاپٹرز کی سڑک کے ذریعے اس غیر معمولی منتقلی کی بنیادی وجہ ممکنہ ایرانی حملوں سے عسکری اثاثوں کو بچانا اور فورسز کو مختلف مقامات پر تقسیم کرنا ہو سکتا ہے۔ تاہم، دفاعی تجزیہ کاروں کے ایک اور طبقے کے مطابق حالیہ ایرانی بیلسٹک میزائل اور ڈرون حملوں کے نتیجے میں ان بلیک ہاک ہیلی کاپٹرز کے روٹر سسٹمز اور پرزوں کو نقصان پہنچا تھا، جس کے باعث یہ اپنی مدد آپ کے تحت پرواز کے قابل نہیں رہے تھے اور انہیں مرمت یا حفاظت کی خاطر ٹرکوں کے ذریعے منتقل کرنا پڑا۔