امریکا نے بھارتی شہریوں کے ’برُتھ ٹورزم‘ کے خواب توڑ دیے، سیاحتی ویزا مزید سخت

واشنگٹن: امریکا نے بھارتی شہریوں کو خبردار کیا ہے کہ اگر کوئی درخواست گزار سیاحتی ویزے کا غلط استعمال کرتے ہوئے امریکا میں بچے کی پیدائش کے ذریعے شہریت حاصل کرنے کا ارادہ رکھتا ہے تو اس کی ویزا درخواست فوراً مسترد کر دی جائے گی۔

امریکی سفارتخانے کے مطابق بھارت سے بڑی تعداد میں ایسے افراد سیاحتی ویزے پر امریکا آتے ہیں جو اپنے بچوں کی پیدائش امریکی سرزمین پر کروا کر شہریت اور مختلف مراعات حاصل کرنا چاہتے ہیں۔ سفارتخانے نے واضح کیا کہ ’’برُتھ ٹورزم‘‘ کو کسی صورت برداشت نہیں کیا جائے گا اور اس مقصد کے لیے سیاحتی ویزے کا استعمال کرنے والوں کے خلاف سخت اقدامات جاری ہیں۔

بیان میں کہا گیا ہے کہ اگر قونصلر افسر کو شواہد یا اندازوں سے یہ یقین ہو جائے کہ درخواست گزار کا اصل مقصد بچے کی پیدائش کے لیے امریکا آنا ہے، تو اسے ویزا جاری نہیں کیا جائے گا۔

امریکا نے ویزا درخواست گزاروں کی آن لائن اور سوشل میڈیا سرگرمیوں کی جانچ کو بھی مزید سخت کر دیا ہے، جو نہ صرف سیاحتی ویزا لینے والوں بلکہ H-1B ہولڈرز اور ان کے H-4 ڈیپنڈنٹس پر بھی لاگو ہوگی۔

یہ اعلان ایسے وقت سامنے آیا ہے جب بھارت میں ہزاروں درخواست دہندگان کو اچانک بتایا گیا کہ ان کی انٹرویوز ری شیڈول کر دی گئی ہیں، جس سے شدید بےچینی پیدا ہوئی ہے۔

واضح رہے کہ صدر ڈونلڈ ٹرمپ اپنی دوسری مدتِ صدارت کے پہلے روز ہی پیدائشی شہریت کے خاتمے کا اعلان کر چکے ہیں، تاہم یہ فیصلہ عدالتی کارروائیوں کے باعث تاحال معطل ہے۔