امریکا نے اسرائیل کو فوجی سازوسامان کی فروخت کی منظوری دیدی

امریکی محکمہ خارجہ نے اسرائیل کو 6.5 ارب ڈالر مالیت کے فوجی سازوسامان کی فروخت کی منظوری دے دی ہے۔ پینٹاگون کے مطابق اس منظوری میں 3.8 ارب ڈالر کے اپاچی ہیلی کاپٹرز اور 1.98 ارب ڈالر کی لائٹ وہیکلز شامل ہیں۔

یہ پیش رفت ایسے وقت میں سامنے آئی ہے جب اسرائیلی وزیراعظم بنیامین نیتن یاہو نے غزہ کے مستقبل سے متعلق اپنا منصوبہ پیش کیا ہے۔ نیتن یاہو کے مطابق اسرائیلی فوج دریائے اردن سے بحیرۂ روم تک پورے علاقے پر سکیورٹی کنٹرول برقرار رکھے گی جس میں غزہ بھی شامل ہوگا۔

انہوں نے کہا کہ غزہ کی تعمیرِ نو سے قبل حماس کو مکمل طور پر غیر مسلح کرنا، سرنگوں سمیت اس کے عسکری ڈھانچے کا خاتمہ ضروری ہے۔ نیتن یاہو نے واضح کیا کہ جب تک حماس غیر مسلح نہیں ہوتی، غزہ پر سکیورٹی کنٹرول اسرائیلی فوج کے پاس رہے گا۔

اسرائیلی وزیراعظم کا مزید کہنا تھا کہ غزہ جنگ بندی معاہدے کے پہلے مرحلے کی تکمیل اس وقت ممکن ہوئی جب حماس نے تمام زندہ اسرائیلی یرغمالیوں کو رہا کیا اور ہلاک ہونے والے یرغمالیوں کی لاشیں بھی اسرائیل کے حوالے کیں، جن میں آخری مقتول یرغمالی ران گویلی کی لاش کی واپسی بھی شامل ہے۔