چابہار سمیت ایران کے مختلف شہروں میں دھماکوں کی آوازیں سنی گئی ہیں، ایرانی میڈیا

ایران اور امریکا کے درمیان جاری حالیہ جنگ کے تناظر میں کشیدگی انتہائی سنگین رخ اختیار کر گئی ہے، جہاں ایرانی میڈیا نے چابہار اور اہواز سمیت ملک کے مختلف شہروں میں شدید دھماکوں کی تصدیق کی ہے۔ ایران کی سرکاری مہر نیوز ایجنسی کے مطابق، عراق کی سرحد کے قریب واقع ایرانی شہر اہواز میں زوردار دھماکوں کی آوازیں سنی گئی ہیں۔ واضح رہے کہ رواں ماہ فوجی کشیدگی دوبارہ شروع ہونے کے بعد سے اسٹریٹجک اہمیت کے حامل شہر اہواز کو متعدد مرتبہ امریکی فضائی کارروائیوں کا نشانہ بنایا جا چکا ہے۔

دوسری جانب، پاکستان کی سرحد کے قریب واقع ایران کے ساحلی شہر اور بندرگاہ چابہار میں بھی یکے بعد دیگرے 3 خوفناک دھماکوں کی آوازیں سنی گئیں۔ ایرانی میڈیا رپورٹس کے مطابق، امریکی میزائلوں نے چابہار میں واقع بحری نگرانی کے ایک اہم ٹاور کو نشانہ بنایا، جو سمندری سکیورٹی اور ماہی گیروں کی تلاش و ریسکیو (سرچ اینڈ ریسکیو) کارروائیوں کے لیے استعمال کیا جاتا تھا۔ یہ بمباری اس وقت سامنے آئی ہے جب امریکی سینٹرل کمانڈ (CENTCOM) نے باضابطہ اعلان کیا کہ امریکی فوج نے ایران کے خلاف فضائی حملوں کی دوسری لہر شروع کر دی ہے، جس کا مقصد ایران کی سمندری اور دفاعی صلاحیتوں کو مفلوج کرنا ہے۔