اپر سوات میں غیر معیاری کشتیوں کیخلاف کریک ڈاؤن کا فیصلہ

خیبرپختونخوا کے سیاحتی مقامات پر کشتی ڈوبنے کے بڑھتے ہوئے ناخوشگوار واقعات کے پیش نظر ضلعی انتظامیہ اپر سوات نے سیاحوں کے تحفظ کے لیے تمام کشتیوں کا جامع سروے کرنے کا فیصلہ کیا ہے۔ انتظامیہ کے مطابق اس سروے کے تحت کشتیوں کی فٹنس اور آپریشنل صلاحیت کا جائزہ لیا جائے گا، جبکہ حفاظتی معیار پر پورا نہ اترنے والی کشتیوں کے چلانے پر مکمل پابندی عائد کی جائے گی۔ اس سلسلے میں مشہور سیاحتی مقام مہوڈنڈ جھیل پر بوٹنگ سروسز کی رجسٹریشن کا عمل شروع کر دیا گیا ہے اور واضح کیا گیا ہے کہ بغیر این او سی (NOC) کسی بھی کشتی کو جھیل میں اترنے کی اجازت نہیں ہوگی۔ تمام آپریٹرز کا ڈیٹا، دستاویزات اور تصدیق کے بعد معاملہ ٹی ایم او کے سپرد کیا جائے گا تاکہ بوٹنگ سرگرمیوں کو قانونی تقاضوں کے مطابق محفوظ اور منظم بنایا جا سکے۔