بنگلہ دیش کے وزیرخارجہ ڈاکٹر خلیل الرحمٰن اقوام متحدہ جنرل اسمبلی کے صدر منتخب

اقوام متحدہ کی جنرل اسمبلی کے 81ویں اجلاس کے لیے بنگلہ دیش کے وزیر خارجہ خلیل الرحمٰن صدر منتخب ہو گئے ہیں۔ انہوں نے قبرص کے امیدوار اینڈریاس کاکورِس کو سخت مقابلے کے بعد شکست دی۔

تفصیلات کے مطابق خفیہ رائے شماری کے ذریعے ہونے والے انتخاب میں خلیل الرحمٰن نے 99 ووٹ حاصل کیے جبکہ ان کے مدمقابل امیدوار کو 91 ووٹ ملے۔ مجموعی طور پر 190 ووٹ ڈالے گئے اور کوئی ووٹ مسترد یا غیر حاضر نہیں رہا۔

اقوام متحدہ کے نظام کے مطابق جنرل اسمبلی کی صدارت پانچ علاقائی گروپوں میں باری باری منتقل ہوتی ہے اور اس بار یہ عہدہ ایشیا پیسفک گروپ کے حصے میں آیا ہے۔

خلیل الرحمٰن 8 ستمبر سے ایک سال کی مدت کے لیے ذمہ داریاں سنبھالیں گے۔ ان کی مدت ایسے وقت میں شروع ہو رہی ہے جب عالمی سطح پر تنازعات، اصلاحاتی دباؤ اور قیادت کی تبدیلیاں اہم چیلنجز کے طور پر سامنے ہیں۔