دہشتگرد مصنوعی ذہانت سے فائدہ اٹھانے میں مہارت حاصل کرچکے: اقوام متحدہ نے خبردار کر دیا

اقوامِ متحدہ نے دنیا بھر کو خبردار کیا ہے کہ دہشت گرد تنظیمیں اپنی سرگرمیوں کو وسعت دینے کے لیے مصنوعی ذہانت (AI) اور جدید ترین ٹیکنالوجی کا سہارا لے رہی ہیں۔

عالمی میڈیا رپورٹس کے مطابق اقوامِ متحدہ کے سیکرٹری جنرل انتونیو گوتریس نے عالمی ادارے کے رکن ممالک کی انسدادِ دہشت گردی ایجنسیوں کے سربراہان کی چوتھی اعلیٰ سطح کی کانفرنس سے خطاب کرتے ہوئے کہا کہ دنیا بھر میں دہشت گرد تنظیمیں بھرتی، مالی وسائل کے حصول اور اپنی کارروائیوں کو پھیلانے کے لیے نئی ٹیکنالوجیز کا بڑھ چڑھ کر استعمال کر رہی ہیں۔ انہوں نے کہا کہ دہشت گرد خود کو تیزی سے نئے حالات کے مطابق ڈھال رہے ہیں۔

سیکرٹری جنرل کا کہنا تھا کہ نئی ٹیکنالوجیز نے دہشت گردوں کے لیے فنڈز اکٹھے کرنا اور نئے کارندوں کی بھرتی کا عمل بہت آسان بنا دیا ہے۔ وہ اب مصنوعی ذہانت (اے آئی)، ڈیجیٹل پلیٹ فارمز اور ڈرونز سمیت دیگر جدید ترین ٹیکنالوجیز سے فائدہ اٹھانے میں مکمل مہارت حاصل کر چکے ہیں۔

تاہم، انتونیو گوتریس نے اس بات پر بھی زور دیا کہ یہی ٹیکنالوجی دہشت گردی کے خلاف ایک مؤثر ہتھیار کے طور پر بھی استعمال کی جا سکتی ہے۔ انہوں نے واضح کیا کہ جدید ٹیکنالوجی خطرات کی بروقت نشاندہی کرنے، غیر قانونی مالی وسائل کی ترسیل کو روکنے اور دہشت گردانہ انتہا پسندی کی طرف لے جانے والے بنیادی عوامل کو سمجھنے کے لیے قانون نافذ کرنے والے اداروں کو طاقتور ذرائع فراہم کرتی ہے۔