اقوام متحدہ کا مصنوعی ذہانت کے ممکنہ تباہ کن خطرات روکنے کیلئے سخت اقدامات کا مطالبہ

اقوام متحدہ نے جدید مصنوعی ذہانت (AI) کے ممکنہ تباہ کن خطرات کو روکنے کے لیے عالمی سطح پر سخت قانونی اور انتظامی اقدامات کا فوری مطالبہ کر دیا ہے۔ اقوام متحدہ کے ہائی کمشنر برائے انسانی حقوق وولکر ترک نے خبردار کیا ہے کہ سرکردہ اے آئی کمپنیوں کی رضاکارانہ خود نگرانی موجودہ نقصانات سے نمٹنے اور خودکار اے آئی ماڈلز کو انسانی حفاظتی نظام سے باہر نکلنے سے روکنے کے لیے انتہائی ناکافی ہے۔ انہوں نے ایک خط میں واضح کیا کہ زیادہ سے زیادہ طاقتور اے آئی ماڈلز کی دوڑ انسانوں کی زندگی کے ہر شعبے کے لیے سنگین تباہ کن خطرات پیدا کر رہی ہے۔

وولکر ترک نے فرنٹیئر اے آئی کمپنیوں کی میزبانی کرنے والے ممالک—خصوصاً امریکہ اور چین—پر زور دیا کہ وہ ان کمپنیوں کے لیے سنگین واقعات کی رپورٹنگ، صلاحیتوں کی سائنسی تصدیق اور انسانی حقوق سے متعلق جائزہ لازمی قرار دیں۔ انہوں نے کہا کہ کوئی ایک ملک یا کمپنی دنیا کے لیے خطرات کا تعین نہیں کر سکتی، لہٰذا باہمی مسابقت کو ضوابط کی کمی کا باعث نہیں بننا چاہیے۔ انہوں نے ان خدشات کو مسترد کر دیا کہ حفاظتی اقدامات سے جدت سست ہوتی ہے اور کہا کہ غلط معلومات کے پھیلاؤ، روزگار کے خاتمے، صحت اور سیکیورٹی سے متعلق فیصلے شفاف انداز میں انسانی حقوق کو مدنظر رکھ کر کیے جانے چاہئیں