اقوام متحدہ کا غیر قانونی یہودی بستی گیوات زیو کو شہر کا درجہ دیے جانے پر اظہار تشویش

اقوامِ متحدہ کے سیکرٹری جنرل انتونیو گوتریس نے اسرائیل کی جانب سے مقبوضہ مغربی کنارے میں قائم غیر قانونی صیہونی بستی “گیوات زیو” کو باقاعدہ شہر کا درجہ دیے جانے پر گہری تشویش کا اظہار کیا ہے۔ اقوامِ متحدہ کے ترجمان سٹیفن دوجارک نے ایک پریس کانفرنس کے دوران عالمی ادارے کے موقف کی وضاحت کرتے ہوئے کہا کہ اسرائیل کی جانب سے دی گئی یہ انتظامی حیثیت بین الاقوامی قانون کے تحت گیوات زیو کی قانونی حیثیت کو ہرگز تبدیل نہیں کرتی، اور یہ علاقہ بدستور مقبوضہ فلسطینی سرزمین کا ہی حصہ رہے گا۔

واضح رہے کہ اسرائیلی فوج کی سینٹرل کمانڈ کے سربراہ ایوی بلوتھ نے اتوار کے روز باضابطہ اعلان کیا تھا کہ مقبوضہ مشرقی یروشلم سے تقریباً 5 کلومیٹر شمال مغرب میں واقع یہودی بستی گیوات زیو کو اب باقاعدہ ایک اسرائیلی شہر قرار دے دیا گیا ہے۔ اسرائیل کے اس یکطرفہ اقدام کو اقوامِ متحدہ نے بین الاقوامی قوانین کی خلاف ورزی قرار دیتے ہوئے مسترد کر دیا ہے۔