80 ممالک کا آبنائے ہرمز کھولنے کا مطالبہ، ایران، حوثیوں کے حملوں کی شدید مذمت

اقوامِ متحدہ کے اجلاس کے دوران دنیا کے 80 ممالک نے ایک مشترکہ اعلامیے میں بحری تجارتی راستے ‘آبنائے ہرمز’ کو فوری طور پر کھولنے کا مطالبہ کرتے ہوئے خطے میں حملوں اور عالمی تجارت میں خلل ڈالنے پر ایران اور یمن کی حوثی ملیشیا کی شدید مذمت کی ہے۔ خلیجی عرب ریاستوں اور بڑی مغربی طاقتوں کی حمایت سے تیار کردہ یہ مشترکہ بیان بحرین کے وزیرِ خارجہ عبداللطیف بن راشد الزایانی نے پڑھ کر سنایا، جس میں کہا گیا کہ آبنائے ہرمز میں ایرانی اقدامات عالمی سلامتی اور بین الاقوامی جہاز رانی کے حقوق کی مسلسل خلاف ورزی ہیں۔

مشترکہ اعلامیے میں یمن کی موجودہ صورتحال پر گہری تشویش کا اظہار کرتے ہوئے حوثی ملیشیا کی جانب سے جنگ بندی ختم کر کے دوبارہ تنازع شروع کرنے، سعودی عرب پر مسلسل حملوں اور بحیرہ احمر میں کارروائیوں کی سخت الفاظ میں مذمت کی گئی۔ اعلامیے میں خبردار کیا گیا ہے کہ باب المندب کی جانب حوثیوں کی متوقع پیش قدمی سے عالمی میری ٹائم سیکیورٹی، بین الاقوامی جہاز رانی اور دنیا بھر کی معاشی تجارت کو لاحق خطرات میں مزید اضافہ ہوگا۔