صحافی پر حملے کا معاملہ، برطانیہ نے ایران کے سینئر سفارت کار کو طلب کر لیا

برطانیہ نے ایرانی ریاست کی ایما پر ایک برطانوی صحافی پر قاتلانہ حملے کے معاملے میں ایران کے سینئر ترین سفارت کار کو باضابطہ طور پر طلب کر کے شدید احتجاج ریکارڈ کروایا ہے۔

یہ سفارتی اقدام برطانوی عدالت کی جانب سے دو رومانیائی شہریوں کو 2024ء میں ایرانی نژاد برطانوی صحافی پوریا زراعتی پر حملے میں ملوث قرار دے کر سزا سنائے جانے کے بعد اٹھایا گیا۔ برطانوی دفترِ خارجہ کے ترجمان کے مطابق، عدالت نے اپنے فیصلے میں واضح طور پر قرار دیا ہے کہ یہ حملہ ایرانی ریاست کے مفاد میں اور اسی کی ایما پر کیا گیا تھا۔

واضح رہے کہ دونوں مجرموں کو گزشتہ ہفتے جنوب مغربی لندن میں صحافی پوریا زراعتی کو چاقو مار کر شدید زخمی کرنے کے جرم میں عدالت کی طرف سے طویل قید کی سزا سنائی گئی ہے، جس کے بعد دونوں ممالک کے درمیان سفارتی کشیدگی میں مزید اضافہ ہو گیا ہے۔