برطانوی رائل ائیرفورس کا جنگی طیارہ تربیت کے دوران گر کر تباہ

برطانوی رائل ایئر فورس (RAF) کا ایک جیٹ تربیتی طیارہ شمال مغربی ویلز میں معمول کی پرواز کے دوران حادثے کا شکار ہو کر زمین بوس ہو گیا۔ غیر ملکی میڈیا رپورٹس کے مطابق ‘ہاک ٹی 2’ (Hawk T2) طیارے نے اینگلسی میں واقع آر اے ایف ویلی ایئر بیس سے پرواز بھری تھی کہ کچھ ہی دیر بعد تکنیکی خرابی کی وجہ سے قریبی علاقے میں گر کر تباہ ہو گیا۔ سوشل میڈیا پر وائرل ہونے والی مناظر میں طیارے کو گرنے کے بعد تباہ ہوتے دیکھا جا سکتا ہے۔

واقعے کے وقت طیارے میں دو پائلٹس موجود تھے جو خوش قسمتی سے وقت پر ایجیکٹ (خارج) ہونے میں کامیاب رہے اور انہیں صرف معمولی چوٹیں آئیں۔ برطانوی رائل ایئر فورس کی انتظامیہ نے حادثے کی تحقیقات کا حکم دے دیا ہے جبکہ حفاظتی اقدامات کے تحت تحقیقات مکمل ہونے تک تمام ‘ہاک ٹی 1’ اور ‘ہاک ٹی 2’ طیاروں کی ترسیل و تربیتی پروازوں کے آپریشنز کو عارضی طور پر معطل کر دیا گیا ہے۔