برطانیہ کا ایران کی شخصیات اور اداروں پر نئی پابندیوں کا اعلان

برطانیہ نے ایران کی متعدد شخصیات اور اداروں پر نئی پابندیاں عائد کرنے کا اعلان کر دیا ہے۔ برطانوی حکام کے مطابق یہ پابندیاں انسانی حقوق کی سنگین خلاف ورزیوں میں ملوث ہونے پر لگائی گئی ہیں۔

برطانوی حکومت کا کہنا ہے کہ پابندیوں کے تحت نامزد افراد اور اداروں کے برطانیہ میں موجود اثاثے منجمد کر دیے جائیں گے، جبکہ ان پر سفری پابندیاں بھی عائد ہوں گی، جس کے نتیجے میں وہ برطانیہ کا سفر نہیں کر سکیں گے۔

حکام نے واضح کیا ہے کہ یہ اقدام انسانی حقوق کے تحفظ اور عالمی سطح پر جوابدہی کو یقینی بنانے کے لیے اٹھایا گیا ہے۔ برطانوی مؤقف کے مطابق ایسے عناصر کے خلاف کارروائی ناگزیر ہے جو بنیادی انسانی اقدار کو پامال کرتے ہیں۔

برطانیہ نے اس عزم کا اعادہ کیا ہے کہ وہ دنیا بھر میں انسانی حقوق کی خلاف ورزیوں کے خلاف سخت مؤقف اختیار کرتا رہے گا اور اس حوالے سے اپنی پالیسی پر عملدرآمد جاری رکھے گا۔