ایران امریکا کشیدگی: برطانیہ نے 4 لڑاکا طیارے قطر میں تعینات کر دیے

ایران اور امریکا کے درمیان بڑھتی ہوئی کشیدگی کے دوران برطانیہ نے اپنے چار ٹائفون لڑاکا طیارے قطر میں تعینات کر دیے ہیں۔

برطانوی وزارتِ دفاع کی جانب سے جاری بیان میں کہا گیا ہے کہ چار ٹائفون لڑاکا طیاروں کو دفاعی مقاصد کے تحت قطر بھیجا گیا ہے تاکہ خطے میں سیکیورٹی صورتحال پر نظر رکھی جا سکے۔

برطانوی وزارتِ دفاع کے مطابق یہ اقدام ایسے وقت میں سامنے آیا ہے جب امریکی صدر ڈونلڈ ٹرمپ نے ایران کو خبردار کیا ہے کہ امریکا مشرقِ وسطیٰ کی جانب ایک بڑا بحری بیڑا روانہ کر رہا ہے۔

اس سے قبل امریکی صدر ٹرمپ کا کہنا تھا کہ امریکا ایران کے خلاف مزید فوجی کارروائی نہیں کرے گا، تاہم اگر ایران نے اپنا جوہری پروگرام دوبارہ شروع کیا تو امریکا اس کا سخت جواب دے گا۔

عالمی مبصرین کے مطابق خطے میں بڑھتی ہوئی عسکری سرگرمیاں مشرقِ وسطیٰ کی صورتحال کو مزید حساس بنا سکتی ہیں۔