متحدہ عرب امارات میں بچوں کے سوشل میڈیا قوانین نافذ، والدین پر بھاری جرمانے عائد

متحدہ عرب امارات میں بچوں کی آن لائن سرگرمیوں کو محفوظ بنانے کے لیے نیا چائلڈ ڈیجیٹل سیفٹی قانون نافذ العمل ہو گیا ہے، جس کے تحت والدین اور سوشل میڈیا پلیٹ فارمز پر سخت قانونی ذمہ داریاں عائد کر دی گئی ہیں۔

عرب میڈیا کے مطابق 13 سال سے کم عمر بچوں کے ذاتی ڈیٹا کے استعمال کے لیے والدین کی واضح، تحریری اور قابل تصدیق اجازت لازم قرار دی گئی ہے، جبکہ یہ اجازت کسی بھی وقت واپس لی جا سکتی ہے۔

نئے قانون کے تحت بچوں کے ڈیٹا کو کمرشل مقاصد یا ٹارگٹڈ اشتہارات کے لیے استعمال کرنا مکمل طور پر ممنوع ہوگا۔ اس کے علاوہ 18 سال سے کم عمر بچوں کے لیے آن لائن کمرشل گیمنگ، جوا اور بیٹنگ پلیٹ فارمز تک رسائی بند کر دی گئی ہے۔

قانون کے مطابق والدین اور سرپرست اب قانونی طور پر بچوں کی آن لائن سرگرمیوں کی نگرانی کے ذمہ دار ہوں گے۔ ٹائمز آف انڈیا کے مطابق نگرانی میں غفلت برتنے پر والدین پر ایک ملین درہم تک جرمانہ عائد کیا جا سکتا ہے۔

یہ قانون نہ صرف یو اے ای میں قائم کمپنیوں بلکہ تمام غیر ملکی سوشل میڈیا پلیٹ فارمز، گیمنگ ایپس اور آن لائن سروسز پر بھی لاگو ہوگا۔