ترکیہ اور مصر نے ہم جنس پرست سیاحوں کے جہاز کو داخل ہونے سے روکدیا

یونان سے اٹلی تک خصوصی سیاحتی سفر پر نکلے ہوئے امریکی ہم جنس پرست (LGBTQ) سیاحوں کے ایک لگژری بحری جہاز کو ترکیہ اور مصر نے اپنی بندرگاہوں اور سمندری حدود میں داخل ہونے کی اجازت دینے سے انکار کر دیا ہے۔ عالمی خبر رساں ادارے کے مطابق، امریکی کمپنی ‘اٹلانٹس ایونٹس’ کے چارٹرڈ کروز شپ “اسکارلٹ لیڈی” پر تقریباً 1,900 مسافر سوار تھے، جن میں اکثریت امریکی، برطانوی، کینیڈین اور آسٹریلوی شہریوں کی تھی۔ جہاز کمپنی کے صدر کے مطابق، تمام ضروری اجازت نامے موجود ہونے کے باوجود پہلے ترکیہ نے دو بندرگاہوں پر لنگر انداز ہونے کی اجازت نہیں دی، اور جب متبادل کے طور پر مصر کا رخ کیا گیا تو انہوں نے بھی آخری لمحے پر داخلے پر پابندی لگا دی۔ ترک حکام نے اپنے مؤقف میں کہا ہے کہ جہاز پر موجود گروپ کا طرزِ عمل ترک معاشرے کی اخلاقی اور سماجی اقدار کے منافی ہے، اس لیے یہ فیصلہ کیا گیا۔ مصر نے باضابطہ بیان جاری نہیں کیا لیکن وہاں بھی ایسے گروپس کے خلاف سخت اخلاقی قوانین موجود ہیں۔ اس اچانک فیصلے کے باعث مسافروں کے اہرامِ مصر سمیت تمام تاریخی دورے منسوخ کر کے جہاز کا رخ یونان کے جزیرے کریٹ کی طرف موڑ دیا گیا ہے۔