قطر اور ترکیہ کے درمیان دفاع میں تعاون سمیت 5 معاہدوں پر دستخط

ترکیہ کے صدر رجب طیب اردگان اور قطر کے امیر شیخ تمیم بن حمد آل ثانی کے درمیان استنبول میں ایک اہم ملاقات ہوئی ہے، جس میں دوطرفہ تعلقات، خطے کی موجودہ صورتِ حال اور اہم عالمی امور پر تفصیلی تبادلہ خیال کیا گیا۔

ترکیہ کے ڈائریکٹوریٹ آف کمیونیکیشنز کے مطابق دونوں رہنماؤں کی زیرِ قیادت ہونے والے سپریم سٹریٹیجک کمیٹی کے 12ویں اجلاس کے موقع پر قطر اور ترکیہ کے درمیان دفاعی تعاون سمیت مختلف شعبوں میں باہمی تعاون کے پانچ اہم معاہدوں اور دستاویزات پر باضابطہ دستخط کیے گئے۔

صدر رجب طیب اردگان نے ملاقات اور معاہدوں پر دستخط کے بعد اپنے بیان میں کہا کہ آج قطر اور ترکیہ کے درمیان طے پانے والا باہمی دفاعی معاہدہ دونوں برادر ممالک کے دیرینہ تعلقات میں ایک نئی اور مضبوط جہت کا اضافہ کرے گا۔

اجلاس کے بعد جاری ہونے والے مشترکہ اعلامیے کے مطابق طے پانے والے پانچ معاہدوں اور مفاہمتی یادداشتوں میں دفاعی تعاون کے معاہدے کے علاوہ تعلیم کے شعبے میں باہمی تعاون کا معاہدہ، امن و مصالحت اور تنازعات کے پرامن حل سے متعلق مفاہمتی یادداشت، اور صارفین کے تحفظ و مارکیٹ کی نگرانی کے شعبے میں تعاون کی مفاہمتی یادداشت بھی شامل ہیں۔