ایران کا دشمنوں کیخلاف طاقتور اور دردناک فوجی کارروائیوں کا اعلان

ایران کی پاسدارانِ انقلاب (آئی آر جی سی) کے نائب کمانڈر انچیف میجر جنرل مصطفیٰ ایزدی نے دوٹوک الفاظ میں انتباہ جاری کیا ہے کہ ایران اپنے دشمنوں کے خلاف سخت، طاقتور اور انتہائی دردناک فوجی کارروائیاں کرنے کے لیے ہر لحاظ سے مکمل طور پر تیار ہے، اور مستقبل میں کسی بھی ممکنہ جارحیت یا حملے کی صورت میں اس کی بھرپور جوابی کارروائی کا دائرہ کار صرف خطے تک محدود نہیں بلکہ اس سے باہر بھی پھیل سکتا ہے۔

ایک معروف لبنانی ٹیلی ویژن کو انٹرویو دیتے ہوئے میجر جنرل مصطفیٰ ایزدی کا کہنا تھا کہ امریکا اور اسرائیل کی جانب سے مسلط کردہ بلاجواز جنگ کے بعد اسلامی جمہوریہ ایران نے اپنی عسکری تیاریوں اور دفاعی صلاحیتوں میں نمایاں اور تزویراتی اضافہ کیا ہے۔

انہوں نے مزید کہا کہ حالیہ 40 روزہ جنگ کے دوران ایران نے عملی طور پر ثابت کر دیا ہے کہ وہ غیر متزلزل عزم، آہنی طاقت اور بھرپور تیاری کے ساتھ دشمن کے خلاف انتہائی مؤثر اور تباہ کن فوجی کارروائیاں کرنے کی بھرپور صلاحیت رکھتا ہے۔