ترکیہ نے نیتن یاہو حکومت کو بین الاقوامی سلامتی کیلئے سنگین خطرہ قرار دیدیا

ترکیہ نے نیتن یاہو حکومت کو خطے اور خود اسرائیل کے لیے ایک سنگین بوجھ قرار دیتے ہوئے بین الاقوامی سلامتی کے لیے بڑا خطرہ قرار دے دیا ہے۔ ترک وزیر خارجہ حاقان فیدان نے اپنے ایک بیان میں کہا ہے کہ موجودہ اسرائیلی حکومت عالمی امن کے لیے خطرہ بن چکی ہے اور یہ ایک ایسی حقیقت ہے جسے اب امریکی صدر ڈونلڈ ٹرمپ بھی بخوبی سمجھتے ہیں۔ انہوں نے انکشاف کیا کہ حماس، حزب اللہ اور ایران کے خلاف جنگ کے بعد اب نیتن یاہو کو اپنی بقا کے لیے ایک اور نئے دشمن کی ضرورت ہے، یہی وجہ ہے کہ نیتن یاہو اینڈ کمپنی اب ترکیہ کو اپنا دشمن بنانے کی سرتوڑ کوششوں میں مصروف ہے۔ ترک وزیر خارجہ کا مزید کہنا تھا کہ اسرائیل میں جب بھی انتخابات قریب آتے ہیں، نیتن یاہو اور ان کے سیاسی ساتھیوں کو اپنی سیاست چمکانے کے لیے کسی نہ کسی نئے دشمن کی ضرورت پڑ جاتی ہے۔