امریکی صدر کا چینی ہم منصب سے ٹیلیفونک رابطہ، ٹرمپ نے گفتگو کو شاندار قرار دے دیا

امریکی صدر ڈونلڈ ٹرمپ اور چینی صدر شی جن پنگ کے درمیان ٹیلیفونک رابطہ ہوا ہے، جس میں دوطرفہ اور عالمی امور پر تفصیلی تبادلہ خیال کیا گیا۔ امریکی صدر نے چینی ہم منصب سے ہونے والی بات چیت کو شاندار قرار دیا۔

صدر ٹرمپ کے جاری کردہ بیان کے مطابق گفتگو میں تجارت، فوجی امور، تائیوان، روس یوکرین تنازع اور ایران کی موجودہ صورتحال پر بات ہوئی۔ انہوں نے کہا کہ چین کی جانب سے امریکا سے تیل، گیس، اضافی زرعی مصنوعات کی خریداری اور طیاروں کے انجنوں کی ترسیل جیسے معاملات بھی زیر غور آئے۔

چینی میڈیا کے مطابق صدر شی جن پنگ نے گفتگو کے دوران امریکا چین تعلقات میں تائیوان کے مسئلے کو انتہائی حساس قرار دیا اور امریکا پر زور دیا کہ تائیوان کے ساتھ اسلحہ معاہدوں میں احتیاط برتی جائے۔

ادھر چینی اور روسی صدور کے درمیان بھی ٹیلیفونک رابطہ ہوا، جس میں ایران، یوکرین اور دیگر عالمی امور پر تبادلہ خیال کیا گیا۔ کریملن کے مطابق روسی صدر پیوٹن نے دورہ چین کی دعوت قبول کر لی ہے۔