امریکی بحری بیڑہ ایران کی طرف بڑھ رہا ہے، اب ایران کو سمجھوتا کرنا ہوگا، صدر ٹرمپ

امریکی صدر ڈونلڈ ٹرمپ نے کہا ہے کہ امریکا کا بحری بیڑہ ایران کی جانب پیش قدمی کر رہا ہے اور انہیں امید ہے کہ ایران امریکا کے ساتھ ڈیل کرنے پر آمادہ ہو جائے گا۔

آئیوا میں منعقدہ تقریب سے خطاب کے دوران صدر ٹرمپ نے کہا کہ جون میں ایران کی جوہری صلاحیت کو نشانہ بنایا گیا، جبکہ فوجی کارروائی میں کسی شہری کی ہلاکت نہیں ہوئی۔

صدر ٹرمپ نے اس موقع پر وسط مدتی انتخابات کے لیے اپنی مہم کا باضابطہ آغاز کرنے کا اعلان بھی کیا۔ ان کا کہنا تھا کہ وہ وسط مدتی انتخابات میں واضح کامیابی حاصل کریں گے، تاہم شکست کی صورت میں امریکا کو بھاری نقصان اٹھانا پڑے گا۔

انہوں نے دعویٰ کیا کہ ایک سال پہلے امریکا کو تاریخی مہنگائی کا سامنا تھا، مگر اب معیشت بہتری کی جانب گامزن ہے اور مہنگائی کی شرح کم ہو چکی ہے۔

امریکی صدر کے مطابق امریکا اس وقت عالمی سرمایہ کاروں کے لیے محفوظ ترین ممالک میں شامل ہے اور گزشتہ ایک سال کے دوران سرمایہ کاری کا حجم 18 ٹریلین ڈالر تک پہنچ چکا ہے۔ صدر ٹرمپ نے مزید کہا کہ غیرقانونی تارکین وطن کے لیے امریکی سرحدیں بند کر دی گئی ہیں اور عالمی سطح پر امریکا کی ساکھ میں نمایاں اضافہ ہوا ہے۔