کیئر اسٹارمر کے ردعمل کے بعد ٹرمپ نے برطانوی فوجیوں سے متعلق بیان بدل دیا

برطانوی وزیراعظم سر کیئر اسٹارمر کے سخت ردعمل کے بعد امریکی صدر ڈونلڈ ٹرمپ نے افغانستان میں برطانوی فوجیوں کے کردار سے متعلق اپنا بیان تبدیل کر دیا ہے۔ امریکی صدر نے اپنے تازہ بیان میں برطانوی فوجیوں کو بہادر اور عظیم قرار دیتے ہوئے کہا کہ وہ ہمیشہ امریکا کے ساتھ کھڑے رہے ہیں۔

صدر ٹرمپ نے کہا کہ افغانستان میں جانیں قربان کرنے والے 457 برطانوی فوجی عظیم جنگجو تھے اور امریکا و برطانیہ کے درمیان تعلق ایسا مضبوط ہے جو کبھی کمزور نہیں ہو سکتا۔ انہوں نے کہا کہ برطانوی فوجیوں جیسا کوئی نہیں، اور امریکا ان کا ہمیشہ احترام کرتا رہے گا۔

یاد رہے کہ اس سے قبل صدر ٹرمپ کے بیان پر برطانیہ میں شدید ردعمل سامنے آیا تھا، جس پر وزیراعظم کیئر اسٹارمر نے اسے برطانوی فوجیوں کی توہین قرار دیتے ہوئے امریکی صدر سے معافی مانگنے کا مطالبہ کیا تھا۔