تجارتی ٹیرف کے خلاف عدالتی فیصلہ امریکا کے لیے مالی بحران لا سکتا ہے، ٹرمپ

واشنگٹن: امریکی صدر ڈونلڈ ٹرمپ نے خبردار کیا ہے کہ اگر سپریم کورٹ نے ہنگامی تجارتی ٹیرف کے خلاف فیصلہ دیا تو امریکا کو شدید مالی بحران کا سامنا کرنا پڑ سکتا ہے۔

غیر ملکی میڈیا کے مطابق عدالتی فیصلے کی صورت میں امریکا کو سیکڑوں ارب ڈالر واپس کرنے پڑ سکتے ہیں، جس کا انتظام ممکن نہیں ہے۔ ٹرمپ نے سوشل میڈیا پلیٹ فارم ٹروتھ سوشل پر پیغام میں کہا کہ اگر سرمایہ کاری کے ری فنڈز بھی شامل ہوں تو یہ رقم کھربوں ڈالر تک جا سکتی ہے۔

صدر ٹرمپ نے کہا کہ فیکٹریوں، پلانٹس اور مشینری کی سرمایہ کاری کا ازالہ بھی کرنا ہوگا، اور اتنی بڑی رقم کا حساب لگانے میں برسوں لگ سکتے ہیں۔ ان کا کہنا تھا کہ قومی سلامتی سے جڑے معاملے میں عدالتی فیصلہ خلاف آیا تو امریکا شدید بحران کا شکار ہو جائے گا، اور ایک مضبوط امریکا دنیا کے لیے بھی فائدہ مند ہے۔