صدر ٹرمپ نے اوباما دور کا گرین ہاؤس گیسوں سے متعلق اقدام منسوخ کردیا

واشنگٹن: امریکی صدر ڈونلڈ ٹرمپ نے سابق صدر براک اوباما کے دور میں کیے گئے ایک اہم ماحولیاتی فیصلے کو منسوخ کر دیا ہے، جس کے عالمی سطح پر اثرات مرتب ہونے کا خدشہ ظاہر کیا جا رہا ہے۔ ماہرین کے مطابق اس اقدام سے پاکستان سمیت کئی ترقی پذیر ممالک کی معیشت اور خوراک کے نظام پر مزید دباؤ پڑ سکتا ہے۔

غیر ملکی میڈیا رپورٹس کے مطابق 2009 کے اس تاریخی فیصلے میں گرین ہاؤس گیسوں کو عوامی صحت کے لیے خطرہ قرار دیا گیا تھا۔ یہی فیصلہ امریکا میں اخراج کم کرنے سے متعلق وفاقی قوانین، خصوصاً گاڑیوں کے اخراج سے متعلق ضوابط کی قانونی بنیاد بنا تھا۔

وائٹ ہاؤس  نے صدر ٹرمپ کے اقدام کو امریکی تاریخ کی سب سے بڑی ڈی ریگولیشن قرار دیتے ہوئے کہا ہے کہ اس سے گاڑیاں سستی ہوں گی اور آٹو صنعت کے لیے فی گاڑی تقریباً 2400 ڈالر تک لاگت کم ہو سکتی ہے۔

دوسری جانب ماحولیاتی تنظیموں نے اس فیصلے کو موسمیاتی تبدیلی کے خلاف عالمی کوششوں پر سنگین ضرب قرار دیا ہے اور عدالتوں سے رجوع کرنے کا اعلان کیا ہے۔ ان کے مطابق اس اقدام سے گرین ہاؤس گیسوں کے اخراج میں کمی کی رفتار متاثر ہو سکتی ہے۔

ماہرین کا کہنا ہے کہ اگر عالمی سطح پر اخراج میں کمی کے اقدامات کمزور پڑتے ہیں تو اس کے اثرات پاکستان جیسے ممالک پر زیادہ شدت سے محسوس ہوں گے، جو پہلے ہی موسمیاتی تبدیلی کے خطرات کا سامنا کر رہے ہیں۔ بڑھتا ہوا درجہ حرارت، شدید سیلاب، طویل خشک سالی اور گلیشیئرز کے پگھلنے جیسے عوامل پاکستان کی زرعی پیداوار، معیشت اور خوراک کے نظام پر مزید دباؤ ڈال سکتے ہیں۔