8جنگیں رکوائیں مگر نوبل امن انعام نہ ملا، اب دنیا کے امن کا ذمہ دار میں نہیں، ٹرمپ

واشنگٹن: امریکی صدر ڈونلڈ ٹرمپ نے ناروے کے وزیر اعظم یونس گاہر اسٹور کو بھیجے گئے پیغام میں کہا ہے کہ نوبل امن انعام نہ ملنے کے بعد وہ خود کو صرف امن تک محدود رکھنے کا پابند محسوس نہیں کرتے۔

خبر رساں ایجنسی اے ایف پی کے مطابق صدر ٹرمپ نے پیغام میں کہا کہ اگرچہ امن اب بھی ترجیح رہے گا، لیکن وہ اب امریکہ کے لیے بہتر اور مناسب فیصلوں پر توجہ دیں گے۔ انہوں نے اپنی خواہش دہرائی کہ گرین لینڈ پر مکمل اور کلی کنٹرول حاصل کرنا ضروری ہے تاکہ عالمی سطح پر امریکہ کے مفاد محفوظ رہیں۔

صدر ٹرمپ نے ڈنمارک کے گرین لینڈ کے مالکانہ حقوق پر بھی سوال اٹھاتے ہوئے کہا کہ روس یا چین سے اس کی حفاظت وہ نہیں کر سکتے اور تاریخی طور پر بھی کوئی تحریری دستاویز موجود نہیں۔ انہوں نے کہا کہ سینکڑوں سال پہلے کشتی وہاں پہنچی تھی، لیکن امریکی کشتیاں بھی وہاں پہنچی ہیں، اس لیے امریکہ کا کنٹرول لازمی ہے۔

ناروے کے وزیر اعظم اسٹور نے ایک تحریری بیان میں واضح کیا کہ نوبل امن انعام ناروے کی حکومت نہیں دیتی بلکہ یہ خود مختار نوبل کمیٹی کے اختیار میں ہے۔