میرے بغیر آج نیٹو کا وجود ہی نہیں ہوتا : صدر ٹرمپ

واشنگٹن: امریکی صدر ڈونلڈ ٹرمپ نے اپنی صدارت کا ایک سال مکمل ہونے پر وائٹ ہاؤس میں میڈیا سے گفتگو کرتے ہوئے کہا ہے کہ اگر میں ساتھ نہ دیتا تو آج نیٹو تاریخ کا راکھ کا ڈھیر بن چکا ہوتا، یہ افسوسناک مگر حقیقت ہے۔

صدر ٹرمپ نے کہا کہ جتنا میں نے نیٹو کے لیے کام کیا، کسی اور امریکی صدر نے نہیں کیا۔ انہوں نے برطانیہ اور فرانس کے رہنماؤں سے اچھے تعلقات اور قیادت کے ساتھ ہم آہنگی کا بھی ذکر کیا۔

امریکی صدر نے کہا کہ وہ وینزویلا کے سابق صدر نیکولس مادورو سے جیل میں ملاقات کرنے میں دلچسپی نہیں رکھتے اور بورڈ آف پیس کو اقوام متحدہ کا متبادل بنانے کا ارادہ نہیں رکھتے، اقوام متحدہ کو اپنا کام جاری رکھنے دینا چاہیے۔

ٹرمپ نے اعلان کیا کہ وہ پیرس میں ہونے والے G7 اجلاس میں شرکت نہیں کریں گے، تاہم کردوں کی حفاظت کی کوششیں جاری ہیں۔ انہوں نے کہا کہ پاک بھارت جنگ میں 8 طیارے گرائے گئے، اور وزیراعظم شہباز شریف نے اس پر انہیں خراج تحسین پیش کیا کہ کروڑوں جانیں بچائی گئی ہیں۔

صدر ٹرمپ نے مزید کہا کہ پاک بھارت جنگ نہ رکتی تو 10 سے 20 ملین افراد ہلاک ہو سکتے تھے، اور ان کی مداخلت نے اس تباہی کو روکا۔ انہوں نے کہا کہ امریکہ نے وینزویلا سے 50 ملین بیرل تیل حاصل کیا اور روس–یوکرین جنگ کے خاتمے کے لیے کوششیں کر رہا ہے۔

ٹرمپ نے گرین لینڈ کے حوالے سے بھی کہا کہ ایسا فیصلہ کریں گے جس سے امریکہ اور نیٹو دونوں خوش ہوں۔