صدر ٹرمپ ایرانی سپریم لیڈر کو نشانہ بنا سکتے ہیں، سابق امریکی سفیر ڈان شپیرو کا دعویٰ

واشنگٹن: اسرائیل کے لیے سابق امریکی سفیر ڈان شپیرو نے دعویٰ کیا ہے کہ امریکی صدر ڈونلڈ ٹرمپ ایرانی سپریم لیڈر آیت اللہ علی خامنہ ای کو قتل کرنے کی کوشش کر سکتے ہیں۔

سابق سفیر کا یہ بیان ایسے وقت میں سامنے آیا ہے جب ایرانی سپریم لیڈر نے الزام عائد کیا ہے کہ ایران میں تشدد، مظاہروں اور قتل و غارت میں امریکی صدر براہِ راست ملوث ہیں۔

سماجی رابطے کی ویب سائٹ ایکس پر جاری بیان میں ڈان شپیرو نے کہا کہ جلد امریکا کا ایک بڑا بحری بیڑا مشرقِ وسطیٰ میں تعینات ہوگا، جو نہ صرف ایران پر ممکنہ حملے کو آسان بنائے گا بلکہ ایران کی جانب سے کسی بھی ردعمل کی صورت میں دفاعی تیاریوں میں بھی مدد فراہم کرے گا۔

ڈان شپیرو نے مزید کہا کہ امریکا مستقبل میں ایرانی فورسز پر مزید حملے بھی کر سکتا ہے۔ واضح رہے کہ ڈان شپیرو سابق صدر بارک اوبامہ کے دور میں اسرائیل میں امریکی سفیر کے طور پر خدمات انجام دے چکے ہیں۔