ایران میں قتل عام بند، پھانسیوں کا کوئی منصوبہ نہیں، مظاہرین پر تشدد جاری رہا تو سخت ردعمل ہوگا، ٹرمپ

امریکی صدر ڈونلڈ ٹرمپ نے کہا ہے کہ انہیں بتایا گیا ہے کہ ایران میں قتل عام بند ہو گیا ہے اور وہاں پھانسیوں کا کوئی منصوبہ موجود نہیں۔ وائٹ ہاؤس میں میڈیا سے گفتگو کرتے ہوئے صدر نے ایران کو خبردار کیا کہ مظاہرین کے خلاف تشدد جاری رہنے کی صورت میں سخت ردعمل دیا جائے گا۔

صدر ٹرمپ نے وینزویلا کے معاملے پر بھی بات کرتے ہوئے کہا کہ وہاں خفیہ معلومات افشا کرنے والے شخص کو گرفتار کر لیا گیا ہے۔ پینٹاگون کے کنٹریکٹر نے وینزویلا آپریشن سے متعلق حساس معلومات لیک کی تھیں، جس پر کارروائی کی گئی۔

ٹرمپ نے گرین لینڈ کے حوالے سے کہا کہ امریکا اس معاملے پر غور کر رہا ہے اور گرین لینڈ کی اہمیت برقرار ہے۔ انہوں نے مزید کہا کہ ڈنمارک کے ساتھ تعلقات مضبوط ہیں اور دنیا میں تجارت کے ذریعے انہوں نے آٹھ جنگوں کو روکنے میں کردار ادا کیا ہے۔

صدر کے بیانات سے ظاہر ہوتا ہے کہ امریکا خطے میں سخت موقف اختیار کرنے کے لیے تیار ہے، جبکہ عالمی امور میں وینزویلا اور گرین لینڈ بھی اہم ترجیحات میں شامل ہیں۔