ایران کی طرف روانہ بحری بیڑا وینزویلا والے بیڑے سے بھی زیادہ طاقتور، صدر ٹرمپ

امریکی صدر ڈونلڈ ٹرمپ نے ایک بار پھر ایران کی جانب امریکی جنگی جہازوں کی روانگی کا ذکر کرتے ہوئے کہا کہ یہ بحری بیڑا وینزویلا پر امریکی حملے سے قبل بھیجے گئے بیڑے سے کہیں بڑا ہے۔

وائٹ ہاؤس میں میڈیا سے گفتگو کرتے ہوئے ٹرمپ نے کہا: ’ہمارا ایک بڑا بحری بیڑا، یا فلوٹیلا، یا جو بھی آپ اسے کہیں، اس وقت ایران کی طرف جا رہا ہے اور یہ وینزویلا کے لیے بھیجے گئے بیڑے سے بھی بڑا ہے۔‘

جب ان سے خطے میں امریکی فوجی موجودگی کے منصوبے کے بارے میں پوچھا گیا تو ٹرمپ نے کہا کہ ’ہم دیکھیں گے کہ یہ سب کیسے آگے بڑھتا ہے۔ انہیں کہیں نہ کہیں تو رہنا ہی ہے، تو بہتر ہے کہ وہ ایران کے قریب ہی رہیں۔‘

خیال رہے کہ امریکی صدر ٹرمپ اس سے قبل بھی ایران کی جانب ایک بڑا بحری بیڑا بھیجنے کا ذکر کر چکے ہیں۔ اس سے پہلے ٹرمپ نے ایران کو دھمکی دیتے ہوئے کہا تھا کہ ایک بحری بیڑا تیزی سے، بھرپور طاقت، جوش اور واضح مقصد کے ساتھ ایران کی طرف بڑھ رہا ہے۔

صدر ٹرمپ نے سوشل میڈیا پر بیان میں کہا کہ یہ بہت بڑا بحری بیڑا وینیزویلا بھیجے گئے بیڑے سے بھی بڑا ہے اور اس کی قیادت عظیم طیارہ بردار بحری جہاز ابراہم لنکن کر رہا ہے۔ ٹرمپ نے کہا کہ وینزویلا کی طرح، یہ بیڑا بھی ضرورت پڑنے پر فوری اور مؤثر کارروائی کے لیے اہل ہے۔