صدر ٹرمپ ایران کے معاملے میں فوجی آپشن استعمال کر سکتے ہیں: وائٹ ہاؤس

واشنگٹن: وائٹ ہاؤس کی پریس سیکرٹری کیرولین لیوٹ نے کہا ہے کہ امریکی صدر ڈونلڈ ٹرمپ ایران کے معاملے پر ضرورت پڑنے پر فوجی طاقت کے استعمال سے گریز نہیں کریں گے۔

فوکس نیوز کو دیے گئے انٹرویو میں کیرولین لیوٹ نے بتایا کہ صدر ٹرمپ ہمیشہ سفارتکاری کو ترجیح دیتے ہیں، تاہم اگر حالات ضروری ہوئے تو وہ فوجی کارروائی سے نہیں ہچکچائیں گے اور ایرانی حکومت اس حقیقت سے بخوبی آگاہ ہے۔

وائٹ ہاؤس کے مطابق صدر ٹرمپ کے آئندہ اقدامات کا علم صرف انہیں ہی ہے۔ کیرولین لیوٹ نے یہ بھی کہا کہ ایرانی حکومت کے عوامی اور نجی مؤقف میں تضاد پایا جاتا ہے، جہاں عوامی سطح پر کچھ اور اور نجی سطح پر مختلف پیغامات بھیجے جاتے ہیں۔ تاہم نجی بات چیت کی نوعیت کی مزید تفصیلات جاری نہیں کی گئیں۔