ایران پر حملہ نہ کرنے کا فیصلہ میں نے خود کیا، کسی نے قائل نہیں کیا ، صدر ٹرمپ

امریکی صدر ڈونلڈ ٹرمپ نے ایران پر حملہ نہ کرنے کے اپنے فیصلے کے بارے میں کہا کہ کسی نے انہیں قائل نہیں کیا، بلکہ انہوں نے خود اپنے آپ کو یہ فیصلہ کرنے پر آمادہ کیا۔

وائٹ ہاؤس میں میڈیا سے گفتگو کے دوران ایک صحافی نے پوچھا کہ کیا عرب یا اسرائیلی حکام نے آپ کو ایران پر حملہ نہ کرنے کے لیے قائل کیا؟ اس کے جواب میں ٹرمپ نے کہا کہ یہ فیصلہ میں نے خود کیا۔

صدر ٹرمپ نے مزید بتایا کہ گزشتہ روز ایران میں 800 افراد کو پھانسی دی جانی تھی، لیکن یہ عمل نہیں ہوا، جس کا عالمی سطح پر بہت بڑا اثر پڑا۔ اپنے سماجی رابطے کے پلیٹ فارم ٹروتھ سوشل پر انہوں نے ایران کا شکریہ بھی ادا کیا کہ مظاہرین کی سزائیں مؤخر کی گئی ہیں۔

اس سے قبل امریکی اور برطانوی ذرائع نے دعویٰ کیا تھا کہ اسرائیل کے وزیراعظم بنیامین نیتن یاہو اور خلیجی ممالک کی سفارتی کوششوں کے بعد ٹرمپ نے آخری لمحے میں ایران پر ممکنہ حملہ موخر کیا۔ سعودی عرب، قطر اور عمان نے واشنگٹن سے مذاکرات کرتے ہوئے ایرانی قیادت کو اچھے عمل کا موقع دینے کی تجویز دی۔