بورڈ آف پیس کے رکن ممالک غزہ کیلئے 5 ارب ڈالرز فنڈز دیں گے: ٹرمپ

واشنگٹن: امریکی صدر ڈونلڈ ٹرمپ نے کہا ہے کہ غزہ بورڈ آف پیس کے رکن ممالک غزہ کے لیے 5 ارب ڈالرز کے فنڈز فراہم کریں گے۔

سوشل میڈیا پلیٹ فارم Truth Social پر جاری اپنے بیان میں صدر ٹرمپ نے کہا کہ بورڈ کے اراکین کی جانب سے فراہم کردہ رقم غزہ کی تعمیر نو اور انسانی امداد کے لیے استعمال کی جائے گی۔انہوں نے کہا کہ رکن ممالک نے بین الاقوامی استحکام فورس اور مقامی پولیس کے لیے اہلکار فراہم کرنے کا بھی وعدہ کیا ہے۔ صدر ٹرمپ کے مطابق حماس کو طے شدہ معاہدے پر عملدرآمد کرنا اور اسلحہ ترک کرنا ہوگا۔امریکی صدر کا مزید کہنا تھا کہ بورڈ آف پیس تاریخ کا سب سے مؤثر بین الاقوامی ادارہ ثابت ہوگا اور بطور چیئرمین خدمات انجام دینا ان کے لیے اعزاز کی بات ہے۔تجزیہ کاروں کے مطابق اس اعلان سے خطے میں سیاسی و سکیورٹی صورتحال پر اہم اثرات مرتب ہو سکتے ہیں، جبکہ غزہ کی تعمیر نو کے عمل میں عالمی برادری کے کردار پر بھی نئی بحث شروع ہو گئی ہے۔