امریکی صدر ٹرمپ نے یورپ پر ٹیرف عائد کرنے کی دھمکی واپس لے لی

واشنگٹن: امریکی صدر ڈونلڈ ٹرمپ نے گرین لینڈ کے معاملے پر یورپی ممالک پر ٹیرف عائد کرنے کی سابقہ دھمکی واپس لے لی ہے۔

ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ نیٹو کے سیکرٹری جنرل مارک روٹے کے ساتھ انتہائی مثبت ملاقات ہوئی، جس کے بعد گرین لینڈ کے حوالے سے مستقبل کے ممکنہ معاہدے کا فریم ورک تیار کر لیا گیا ہے۔

صدر ٹرمپ نے مزید کہا کہ اگر یہ معاہدہ حتمی شکل اختیار کر لیتا ہے تو امریکا اور تمام نیٹو ممالک کے لیے فائدہ مند ثابت ہوگا۔ نائب صدر جے ڈی وینس، وزیر خارجہ مارکو روبیو، خصوصی ایلچی اسٹیو وِٹکوف اور دیگر حکام مذاکرات کی ذمہ داری سنبھالیں گے۔

ٹرمپ کے مطابق اس پیش رفت کے پیش نظر یکم فروری سے نافذ کیے جانے والے ٹیرف اب عائد نہیں کیے جائیں گے۔ یاد رہے کہ امریکی صدر نے چند روز قبل دھمکی دی تھی کہ جو یورپی ممالک گرین لینڈ پر امریکی دلچسپی کی مخالفت کریں گے، ان پر یکم فروری سے ٹیرف لگایا جائے گا۔