یوکرین جنگ کا فوری خاتمہ ضروری ہے، صدر ٹرمپ کا روس کو واضح پیغام

واشنگٹن: امریکی صدر ڈونلڈ ٹرمپ نے روس اور یوکرین کے درمیان جاری جنگ کے فوری خاتمے پر زور دیتے ہوئے کہا ہے کہ تمام فریقین خطے میں امن چاہتے ہیں۔

عالمی خبر رساں ادارے کے مطابق صدر ٹرمپ نے یہ بیان یوکرینی صدر وولودومیر زیلنسکی سے ملاقات کے بعد میڈیا سے گفتگو میں دیا۔ امریکی صدر کا کہنا تھا کہ ان کی زیلنسکی سے ملاقات بہت مثبت رہی اور بات چیت میں اس بات پر اتفاق پایا گیا کہ جنگ کا خاتمہ ناگزیر ہے۔

صدر ٹرمپ نے بتایا کہ امریکی نمائندہ اسٹیو وِٹکوف جمعے کو روسی صدر ولادیمیر پیوٹن سے ملاقات کریں گے، جس کا مقصد تنازع کے خاتمے کے لیے مذاکرات کو آگے بڑھانا ہے۔

وائٹ ہاؤس کے ترجمان کے مطابق عالمی اقتصادی فورم کے اجلاس کے موقع پر ٹرمپ اور زیلنسکی کے درمیان ہونے والی ملاقات تقریباً ایک گھنٹے تک جاری رہی۔ صدر ٹرمپ نے کہا کہ سب چاہتے ہیں کہ جنگ ختم ہو، امن قائم ہو اور اس کے لیے سفارتی کوششیں اور ثالثی کا عمل جاری ہے۔