دنیا کے طاقتور ترین پاسپورٹس: مسلم ملک یو اے ای سب سے آگے

دبئی: آرٹن کیپیٹل نے 2025 کے لیے دنیا کے سب سے طاقتور پاسپورٹس کی فہرست جاری کر دی، جس میں متحدہ عرب امارات (یو اے ای) مسلسل ساتویں سال سرفہرست رہا۔ یو اے ای کے پاسپورٹ کے حامل شہری ویزا کے بغیر 179 ممالک کا سفر کر سکتے ہیں۔

آرٹن کیپیٹل کے مطابق، یو اے ای کی مستحکم معیشت اور سرمایہ کاری کے لیے دوستانہ ہب کی حیثیت نے اس کے پاسپورٹ کی طاقت برقرار رکھی، جبکہ دیگر اہم ممالک کے پاسپورٹس کی طاقت میں کمی دیکھی گئی۔

فہرست میں دوسرے نمبر پر سنگاپور اور اسپین ہیں، جن کے شہری 175 ممالک میں ویزا کے بغیر سفر کر سکتے ہیں۔ تیسرے نمبر پر سوئٹزرلینڈ، جنوبی کوریا، جرمنی، سویڈن، فن لینڈ، لکسمبرگ، فرانس، اٹلی، نیدرلینڈز، آئرلینڈ، ڈنمارک، یونان، آسٹریا، بیلجیئم، پرتگال، ملائیشیا اور جاپان کے شہری شامل ہیں، جو 174 ممالک تک بغیر ویزے کے جا سکتے ہیں۔

دوسری جانب پاکستانی پاسپورٹ کو کمزور قرار دیا گیا ہے، جس کے حامل شہری صرف 45 ممالک میں ویزا فری سفر کر سکتے ہیں۔ پاکستان کے پاسپورٹ کے نیچے عراق، شام اور افغانستان ہیں۔