امریکی میگزین نے پاکستان کو 2025 میں عالمی توجہ کا مرکز قرار دیا

امریکی میگزین دی ڈپلومیٹ نے رپورٹ میں کہا ہے کہ 2025 میں پاکستان کئی برسوں بعد دوبارہ عالمی توجہ کا مرکز بن گیا۔ میگزین کے مطابق یہ سال پاکستان کے لیے سٹریٹجک واپسی اور عسکری اعتماد کا سال رہا، جس میں عسکری قیادت نے انتہا پسندی کے خلاف واضح اور مضبوط پیغام دیا۔ آرمی چیف نے دوٹوک مؤقف اختیار کیا کہ جہاد کا اعلان صرف ریاست کے اختیار میں ہے، جو انتہا پسندی کے خلاف ایک سنگِ میل قرار پایا۔

میگزین نے کہا کہ پاکستان کی عسکری قیادت نے ریاستی مفادات کا بھرپور تحفظ کیا، آرمی کے وژن نے ریاستی رٹ کو مضبوط کیا اور بھارت کے ساتھ مئی 2025 کی فوجی جھڑپوں نے عالمی توجہ حاصل کی۔ پاکستانی افواج کی کامیاب کارکردگی نے عسکری توازن واضح کیا اور داخلی چیلنجز کے باوجود پاکستان کی سٹریٹجک ساکھ اور ڈیٹرینس کو تقویت دی۔

دی ڈپلومیٹ کے مطابق بھارت کے خلاف کارکردگی نے پاکستان کی فوجی پیشہ ورانہ صلاحیت کو اجاگر کیا اور عالمی دفاعی ماہرین کی توجہ حاصل کی۔ اس دوران پاکستان اور امریکا کے تعلقات میں بھی بہتری دیکھی گئی، جبکہ سعودی عرب کے ساتھ دفاعی معاہدے نے پاکستان کے علاقائی کردار کو مضبوط کیا۔

میگزین نے مزید کہا کہ پاکستان نے افغانستان کے معاملے میں واضح اور مدلل مؤقف اپنایا، ٹی ٹی پی کے خلاف سخت اقدامات کیے اور دہشت گردی کے خلاف مختلف ممالک کے ساتھ تعاون بڑھایا۔ انتہا پسندی کے خلاف موثر اقدامات ریاستی پالیسی کی نئی علامت بنے اور پی آئی اے کی نجکاری کو معیشت میں ممکنہ ٹرننگ پوائنٹ قرار دیا گیا۔

رپورٹ کے مطابق 2025 میں پاکستان کی عسکری اور سٹریٹجک کامیابیوں نے اسے عالمی سطح پر دوبارہ اہم مقام دلایا اور اصلاحات کے لیے نادر مواقع فراہم کیے۔