علی خامنہ ای کی نماز جنازہ: تہران میٹرو میں 70 لاکھ افراد نے سفر کرکے نیا ریکارڈ بنا ڈالا

ایران کے سپریم لیڈر آیت اللہ علی خامنہ ای کی نمازِ جنازہ اور آخری رسومات کے موقع پر دارالحکومت تہران کے میٹرو نیٹ ورک پر غیر معمولی اور تاریخی رش دیکھنے میں آیا، جہاں چند ہی گھنٹوں کے دوران 70 لاکھ سے زائد شہریوں نے سفر کیا۔

ایران کی نیم سرکاری خبر رساں ایجنسی ‘تسنیم نیوز’ کے مطابق ہفتے کی شام ساڑھے پانچ بجے سے اتوار کی صبح سات بجے تک کے قلیل وقت میں تہران میٹرو کے ذریعے 70 لاکھ سے زیادہ افراد نے مختلف اسٹیشنوں کے درمیان سفر کیا۔ آخری رسومات اور جنازے میں ملک بھر سے آئے لاکھوں سوگواروں کی شرکت کے پیشِ نظر حکام نے پہلے ہی شہریوں کو نجی گاڑیوں کے بجائے پبلک ٹرانسپورٹ اور میٹرو سسٹم استعمال کرنے کی ہدایت کی تھی تاکہ سڑکوں پر ٹریفک کا دباؤ کم رہے اور سیکیورٹی و آمد و رفت کے انتظامات کو برقرار رکھا جا سکے۔

تہران میٹرو انتظامیہ نے اس تاریخی رش سے نمٹنے کے لیے خصوصی حکمتِ عملی اپنائی جس کے تحت تمام لائنوں پر اضافی ٹرینیں چلائی گئیں اور متعدد مرکزی اسٹیشنوں پر عملے کی تعداد میں بھی نمایاں اضافہ کیا گیا تاکہ مسافروں کی رہنمائی اور سہولت کو یقینی بنایا جا سکے۔